ഇടുക്കി: കേരളത്തിന്റെ ഊർജമേഖലയുടെ നട്ടെല്ലായ ഇടുക്കി ജലവൈദ്യുത പദ്ധതിയുടെ ഭാഗമായ ഇടുക്കി ആർച്ച് ഡാമും ചെറുതോണി ഡാമും വൈദ്യുതി മന്ത്രി സണ്ണി ജോസഫ് സന്ദർശിച്ച് സ്ഥിതിഗതികൾ വിലയിരുത്തി. ഡാമുകളിലെ നിലവിലെ ജലനിരപ്പ്, സുരക്ഷാ മുൻകരുതലുകൾ, അണക്കെട്ടുകളുടെ പരിപാലനം, വൈദ്യുതി ഉത്പാദനവുമായി ബന്ധപ്പെട്ട പ്രവർത്തനങ്ങൾ എന്നിവ മന്ത്രി നേരിട്ട് പരിശോധിച്ചു.
സംസ്ഥാനത്തിന്റെ ഭാവി ഊർജ സ്വയംപര്യാപ്തതയിൽ നിർണായക പങ്കുവഹിക്കുമെന്ന് പ്രതീക്ഷിക്കുന്ന ഇടുക്കി പമ്പ്ഡ് ഹൈഡ്രോ സ്റ്റോറേജ് പദ്ധതിയെക്കുറിച്ചും മന്ത്രി കെ.എസ്.ഇ.ബി ഉന്നത ഉദ്യോഗസ്ഥരുമായും എൻജിനീയർമാരുമായും വിശദമായ ചർച്ച നടത്തി. പദ്ധതിയുടെ സാങ്കേതിക വശങ്ങളും നിലവിലെ പ്രവർത്തന പുരോഗതിയും യോഗത്തിൽ അവലോകനം ചെയ്തു.
പീക്ക് സമയങ്ങളിൽ വൈദ്യുതി ലഭ്യത ഉറപ്പാക്കുന്നതിനും പുനരുപയോഗ ഊർജത്തിന്റെ സംഭരണശേഷി വർധിപ്പിക്കുന്നതിനുമാണ് പമ്പ്ഡ് ഹൈഡ്രോ സ്റ്റോറേജ് പദ്ധതി ലക്ഷ്യമിടുന്നത്. പദ്ധതി സമയബന്ധിതമായി മുന്നോട്ടുകൊണ്ടുപോകുന്നതിനാവശ്യമായ നിർദേശങ്ങൾ മന്ത്രി ഉദ്യോഗസ്ഥർക്ക് നൽകി.
കേരളത്തിന്റെ ഊർജസുരക്ഷ ഉറപ്പാക്കുന്നതിനും ഹരിതോർജ മേഖലയിൽ പുതിയ മുന്നേറ്റങ്ങൾ സൃഷ്ടിക്കുന്നതിനുമുള്ള പ്രവർത്തനങ്ങളുമായി ഊർജ വകുപ്പ് മുന്നോട്ടുപോകുമെന്ന് മന്ത്രി അറിയിച്ചു.
