തിരുവനന്തപുരം: ഭിന്നശേഷിക്കാർക്ക് വാഹനങ്ങൾ വാങ്ങുമ്പോൾ ലഭിക്കുന്ന റോഡ് നികുതി ഇളവിന്റെ പരിധി സർക്കാർ ഉയർത്തി. ഇനി മുതൽ 15 ലക്ഷം രൂപ വരെ വിലയുള്ള വാഹനങ്ങൾക്ക് റോഡ് നികുതി നൽകേണ്ടതില്ല.
നിലവിൽ വാഹനത്തിന്റെ വാങ്ങൽ വില ഏഴ് ലക്ഷം രൂപ വരെയായിരുന്നു നികുതി ഒഴിവിനുള്ള പരിധി. ഈ പരിധിയാണ് സർക്കാർ പുതിയ ഉത്തരവിലൂടെ 15 ലക്ഷം രൂപയായി ഉയർത്തിയത്.
2026 സെപ്റ്റംബർ 18-ന് പുറപ്പെടുവിച്ച ജി.ഒ. (പി) നം. 24/2026 പ്രകാരമാണ് നികുതി ഇളവിന്റെ പരിധി വർധിപ്പിച്ചിരിക്കുന്നത്. ഇതോടെ കൂടുതൽ വിലയുള്ള വാഹനങ്ങൾ വാങ്ങുന്ന ഭിന്നശേഷിക്കാർക്കും റോഡ് നികുതി ഒഴിവിന്റെ ആനുകൂല്യം ലഭിക്കും.
വാഹനത്തിന്റെ പർച്ചേസ് വാല്യൂ (വാങ്ങൽ വില) അടിസ്ഥാനമാക്കിയാണ് നികുതി ഒഴിവിന്റെ പരിധി നിശ്ചയിച്ചിരിക്കുന്നത്. നേരത്തെ ഏഴ് ലക്ഷം രൂപയായിരുന്ന പരിധി ഇരട്ടിയിലധികമായി ഉയർത്തിയത് ഭിന്നശേഷിക്കാർക്ക് വാഹന ഉടമസ്ഥതയുമായി ബന്ധപ്പെട്ട സാമ്പത്തിക ബാധ്യത കുറയ്ക്കാൻ സഹായിക്കുന്ന നടപടിയായാണ് വിലയിരുത്തപ്പെടുന്നത്.
