റോൾസ്-റോയ്സ് ഹോൾഡിംഗ്സ് ഇന്ത്യയിൽ ബഹുകോടി ഡോളറിന്റെ വികസന പദ്ധതികൾ പ്രഖ്യാപിച്ചു. അടുത്ത അഞ്ച് വർഷത്തിനുള്ളിൽ ഇന്ത്യയിൽ നിന്ന് ഒരു ബില്യൺ ഡോളറിലധികം മൂല്യമുള്ള പ്രാദേശിക സംഭരണം നടത്തുകയാണ് കമ്പനിയുടെ ലക്ഷ്യം. കേന്ദ്ര സർക്കാരിന്റെ ‘മേക്ക് ഇൻ ഇന്ത്യ’ പദ്ധതിക്ക് പിന്തുണ നൽകിക്കൊണ്ടാണ് പ്രതിരോധ, വ്യോമയാന, വൈദ്യുതി സംവിധാന മേഖലകളിൽ പ്രവർത്തനം വ്യാപിപ്പിക്കാൻ കമ്പനി തീരുമാനിച്ചിരിക്കുന്നത്.
പ്രതിരോധ ആവശ്യങ്ങൾക്കുള്ള എഞ്ചിനുകൾ, സിവിൽ വ്യോമയാന മേഖല, പവർ സിസ്റ്റംസ് തുടങ്ങിയ മേഖലകളിൽ ഇന്ത്യയിലെ പങ്കാളിത്തം കൂടുതൽ ശക്തമാക്കുമെന്ന് കമ്പനി അറിയിച്ചു. രാജ്യത്തെ വിതരണ ശൃംഖലയെ കൂടുതൽ പ്രയോജനപ്പെടുത്തുന്നതിനൊപ്പം സാങ്കേതികവിദ്യാ കൈമാറ്റത്തിനും നൈപുണ്യ വികസനത്തിനും കൂടുതൽ പ്രാധാന്യം നൽകുമെന്നും അധികൃതർ വ്യക്തമാക്കി.
ഇന്ത്യയിലെ തൊഴിലവസരങ്ങൾ ഗണ്യമായി വർധിപ്പിക്കാനും റോൾസ്-റോയ്സ് പദ്ധതിയിടുന്നുണ്ട്. നിലവിലുള്ള പ്രവർത്തനങ്ങൾ വികസിപ്പിക്കുന്നതിന്റെ ഭാഗമായി ഇന്ത്യയിലെ ജീവനക്കാരുടെ എണ്ണം ഏകദേശം 10,000 ആയി ഉയർത്തുകയാണ് കമ്പനിയുടെ ലക്ഷ്യം. ഇത് രാജ്യത്തെ വ്യോമയാന-പ്രതിരോധ നിർമ്മാണ മേഖലയ്ക്ക് വലിയ ഉത്തേജനമാകുമെന്നാണ് വിലയിരുത്തൽ.
‘മേക്ക് ഇൻ ഇന്ത്യ’ സംരംഭത്തിന്റെ ഭാഗമായി ആഗോള കമ്പനികൾ ഇന്ത്യയിലെ ഉൽപ്പാദന-വിതരണ ശൃംഖലകളിലേക്ക് കൂടുതൽ നിക്ഷേപം നടത്തുന്നതിനിടെയാണ് റോൾസ്-റോയ്സിന്റെ ഈ പ്രഖ്യാപനവും ശ്രദ്ധേയമാകുന്നത്. ഇന്ത്യയെ ആഗോള നിർമ്മാണ കേന്ദ്രമായി ഉയർത്താനുള്ള ശ്രമങ്ങൾക്ക് ഇത് കൂടുതൽ കരുത്തേകുമെന്നാണ് പ്രതീക്ഷ.
