ആലപ്പുഴ: മാരാരിക്കുളം തെക്ക് പൂങ്കാവ് പടിഞ്ഞാറെ ജംഗ്ഷനിൽ തീരദേശ പാതയിൽ രൂക്ഷമായ വെള്ളക്കെട്ട് അനുഭവപ്പെടുന്ന പ്രദേശം എം.എൽ.എ എ.ഡി. തോമസ് പൊതുമരാമത്ത് വകുപ്പ് (പി.ഡബ്ല്യു.ഡി.) ഉദ്യോഗസ്ഥരുടെയും പ്രദേശത്തെ ജനപ്രതിനിധികളുടെയും സാന്നിധ്യത്തിൽ സന്ദർശിച്ചു. വെള്ളക്കെട്ട് ഒഴിവാക്കി ഈ വഴിയിലൂടെയുള്ള യാത്രാദുരിതം പരിഹരിക്കുന്നതിന് ആവശ്യമായ നടപടികൾക്ക് നിർദേശം നൽകിയതായും പ്രാഥമിക പ്രവർത്തനങ്ങൾ ആരംഭിച്ചതായും അദ്ദേഹം അറിയിച്ചു.
അതേസമയം, ആലപ്പുഴ നഗരചത്വരത്തിലൂടെയുള്ള ഗതാഗതക്കുരുക്കും യാത്രാക്ലേശവും സംബന്ധിച്ച് ജില്ലാ വികസന സമിതി യോഗത്തിൽ എം.എൽ.എ ശക്തമായ വിമർശനം ഉന്നയിച്ചു. ജില്ലാ കോടതി പാലത്തിന് പകരമായി ഒരുക്കിയ സമാന്തര റോഡുകൾ തകർന്നു ഗതാഗതയോഗ്യമല്ലാത്ത നിലയിലാണെന്നും ഈ സാഹചര്യം ഇനിയും തുടരാൻ അനുവദിക്കില്ലെന്നും അദ്ദേഹം വ്യക്തമാക്കി.
നിയമസഭാ സമ്മേളനം പൂർത്തിയായ ശേഷം ജില്ലാ കോടതി പാലത്തിന്റെ നിർമ്മാണ പുരോഗതിയും സമാന്തര റോഡുകളുടെ അറ്റകുറ്റപ്പണിയും വിലയിരുത്തുന്നതിനായി കേരള റോഡ് ഫണ്ട് ബോർഡ്, കിഫ്ബി, പി.ഡബ്ല്യു.ഡി. എന്നിവിടങ്ങളിലെ ഉന്നത ഉദ്യോഗസ്ഥരുടെ യോഗം ആലപ്പുഴ കളക്ടറേറ്റിൽ വിളിച്ചുചേരാൻ തീരുമാനിച്ചതായും അദ്ദേഹം അറിയിച്ചു. ജനപ്രതിനിധിയായി തിരഞ്ഞെടുക്കപ്പെട്ടതിന് പിന്നാലെ തന്നെ വിഷയത്തിൽ ഇടപെട്ടിരുന്നുവെങ്കിലും അന്ന് നടത്തിയ താൽക്കാലിക കുഴിയടയ്ക്കൽ ശാശ്വത പരിഹാരമായില്ലെന്നും അദ്ദേഹം ചൂണ്ടിക്കാട്ടി.
ഔട്ട് പോസ്റ്റ് മുതൽ മഞ്ജുള ബേക്കറി വരെയുള്ള റോഡിന്റെ ശോച്യാവസ്ഥ പരിഹരിക്കണമെന്ന ആവശ്യത്തെ തുടർന്ന് ഡ്രെയിനേജിന്റെയും റോഡിന്റെയും നിർമ്മാണ പ്രവർത്തനങ്ങൾ ഞായറാഴ്ച രാവിലെ മുതൽ ആരംഭിക്കുമെന്ന് കേരള റോഡ് ഫണ്ട് ബോർഡ് അധികൃതർ ഉറപ്പ് നൽകിയതായി എം.എൽ.എ അറിയിച്ചു. നിർമ്മാണ പ്രവർത്തനങ്ങളുടെ ഭാഗമായി പ്രദേശത്ത് താൽക്കാലിക ഗതാഗത നിയന്ത്രണവും ഏർപ്പെടുത്തിയിട്ടുണ്ട്.
