കളമശ്ശേരി: സംസ്ഥാന കർഷകദിനാഘോഷവും കർഷക അവാർഡ് വിതരണച്ചടങ്ങും എറണാകുളം കളമശ്ശേരിയിൽ നടന്നു. മുഖ്യമന്ത്രി വി.ഡി. സതീശൻ ചടങ്ങ് ഉദ്ഘാടനം ചെയ്തു. കൃഷിമന്ത്രി ടി. സിദ്ദിഖ് അധ്യക്ഷനായി.
കാലാവസ്ഥാ വ്യതിയാനവും പ്രകൃതിക്ഷോഭങ്ങളും സൃഷ്ടിക്കുന്ന വെല്ലുവിളികൾക്കിടയിൽ കർഷകരെ കൂടുതൽ കരുത്തുറ്റവരാക്കുന്നതിനുള്ള സമഗ്ര പദ്ധതികളുമായി സംസ്ഥാന സർക്കാർ മുന്നോട്ടുപോകുകയാണെന്ന് മന്ത്രി പറഞ്ഞു.
ഐക്യരാഷ്ട്രസഭ 2026-നെ അന്താരാഷ്ട്ര വനിതാ കർഷക വർഷമായി ആചരിക്കുന്ന സാഹചര്യത്തിൽ കേരളത്തിലും വനിതാ കർഷകരെ കേന്ദ്രീകരിച്ചുള്ള പ്രത്യേക പ്രവർത്തനങ്ങൾ ആവിഷ്കരിച്ചിട്ടുണ്ടെന്ന് മന്ത്രി വ്യക്തമാക്കി. ഉൽപ്പാദനം മുതൽ വിപണനം വരെയുള്ള മേഖലകൾ ശക്തിപ്പെടുത്തുന്നതിനായി അഞ്ചുവർഷ ദൈർഘ്യമുള്ള ‘കൃഷി സഖി’ പദ്ധതിക്ക് സംസ്ഥാനത്ത് തുടക്കമിട്ടതായും അദ്ദേഹം അറിയിച്ചു.
പുതുതലമുറയെ കാർഷിക മേഖലയിലേക്ക് ആകർഷിക്കുന്നതിനായി സംസ്ഥാനത്തെ സ്കൂളുകളിൽ ‘കതിർ കാർഷിക ക്ലബ്ബുകൾ’ ആരംഭിക്കുമെന്നും മന്ത്രി പറഞ്ഞു. ക്ലബ്ബുകളുടെ ഭാഗമായി ‘കതിർ സഞ്ചാരം’ എന്ന പേരിൽ കാർഷിക പഠനയാത്രകളും സംഘടിപ്പിക്കും.
സ്കൂൾ ഉച്ചഭക്ഷണ പദ്ധതിയുമായി ബന്ധപ്പെടുത്തി ‘കതിർ മാർക്കറ്റുകൾ’ സംഘടിപ്പിക്കാനും പദ്ധതിയുണ്ട്. കാർഷിക ക്ലബ്ബുകളിൽ സജീവമായി പ്രവർത്തിക്കുന്ന വിദ്യാർഥികൾക്ക് ഗ്രേസ് മാർക്ക് നൽകുന്നതിനുള്ള സംവിധാനം നടപ്പാക്കാൻ വിദ്യാഭ്യാസ വകുപ്പുമായി ചേർന്ന് നടപടികൾ പുരോഗമിക്കുകയാണെന്നും മന്ത്രി അറിയിച്ചു.
കർഷകരുടെ സംഭാവനകളെ ആദരിക്കുന്നതിനൊപ്പം കാർഷിക മേഖലയെ കൂടുതൽ സുസ്ഥിരവും ആധുനികവുമാക്കുന്നതിനുള്ള വിവിധ പദ്ധതികൾക്ക് ഊന്നൽ നൽകുന്നതാണ് ഇത്തവണത്തെ കർഷകദിനാഘോഷമെന്നും മന്ത്രി വ്യക്തമാക്കി.
