തിരുവനന്തപുരം: തിരുവനന്തപുരം അന്താരാഷ്ട്ര വിമാനത്താവളത്തിലെ പാർക്കിങ് ഫീസ് കുത്തനെ വർധിപ്പിച്ചതിനെതിരെ യൂത്ത് കോൺഗ്രസ് ശക്തമായ പ്രതിഷേധവുമായി രംഗത്ത്. ഒക്ടോബർ 6ന് രാവിലെ വിമാനത്താവളത്തിന്റെ പ്രവേശന കവാടത്തിൽ ബാരിക്കേഡുകൾ ഉയർത്തിയും ടോൾ ബൂത്തുകൾ ഉപരോധിച്ചും പ്രവർത്തകർ പ്രതിഷേധിച്ചു. വാഹനങ്ങളിൽ നിന്ന് ഒരു രൂപ പോലും പാർക്കിങ് ഫീസ് ഈടാക്കാൻ അനുവദിക്കാതെ വാഹനങ്ങൾ കടത്തിവിട്ടു.

അദാനി ഗ്രൂപ്പിന്റെ നിയന്ത്രണത്തിലുള്ള തിരുവനന്തപുരം വിമാനത്താവളത്തിൽ ഒക്ടോബർ 1 മുതലാണ് പുതുക്കിയ പാർക്കിങ് നിരക്കുകൾ നിലവിൽ വന്നത്. യാത്രക്കാരെ കൊണ്ടുവരാനും കൊണ്ടുപോകാനും എത്തുന്നവർക്കും വിമാനത്താവളത്തിലെ ജീവനക്കാർക്കും പുതിയ നിരക്കുകൾ വലിയ സാമ്പത്തിക ബാധ്യത സൃഷ്ടിക്കുന്നുവെന്നാണ് പ്രതിഷേധക്കാരുടെ ആരോപണം.

പുതിയ നിരക്കനുസരിച്ച് സന്ദർശകർക്കുള്ള സൗജന്യ സമയം 10 മിനിറ്റിൽ നിന്ന് 8 മിനിറ്റായി കുറച്ചിട്ടുണ്ട്. സ്വകാര്യ കാറുകൾക്ക് അരമണിക്കൂറിന് 150 രൂപയും ഒരു മണിക്കൂറിന് 200 രൂപയുമാണ് ഈടാക്കുന്നത്.

ടാക്സി കാറുകൾക്ക് എട്ട് മിനിറ്റിന് 180 രൂപയും ഓട്ടോറിക്ഷകൾക്ക് എട്ട് മിനിറ്റിന് 50 രൂപയുമാണ് പുതിയ നിരക്ക്. വിമാനത്താവളത്തിലെ സാധാരണ കരാർ ജീവനക്കാർക്ക് ഇരുചക്രവാഹനം പാർക്ക് ചെയ്യുന്നതിനും പ്രതിമാസം 300 രൂപ ഫീസ് ഏർപ്പെടുത്തിയിട്ടുണ്ട്.

പാർക്കിങ് നിരക്ക് വർധന പിൻവലിക്കണമെന്നും യാത്രക്കാരെയും സാധാരണ ജീവനക്കാരെയും അധിക സാമ്പത്തികഭാരത്തിൽ നിന്ന് ഒഴിവാക്കണമെന്നും ആവശ്യപ്പെട്ടാണ് യൂത്ത് കോൺഗ്രസ് പ്രതിഷേധം നടത്തിയത്. പ്രതിഷേധത്തെ തുടർന്ന് വിമാനത്താവള പ്രവേശന കവാടത്തിൽ സംഘർഷസാധ്യതയും ഗതാഗതക്കുരുക്കും ഉണ്ടായി.