കൊല്ലം: ബീച്ചിൽ തിരയിൽപ്പെട്ട ബന്ധുക്കളായ കുട്ടികളെ രക്ഷിക്കാൻ ശ്രമിക്കുന്നതിനിടെ കടൽച്ചുഴിയിൽപ്പെട്ട് യുവാവ് മരിച്ചു. കൊല്ലം പള്ളിത്തോട്ടം ഗലീലിയ നഗർ സ്വദേശി ജോസഫ് സ്റ്റാൻലി (മനോജ് – 47) ആണ് മരിച്ചത്. സ്വന്തം ജന്മദിനം ആഘോഷിക്കാൻ കുടുംബത്തോടൊപ്പം ബീച്ചിലെത്തിയതായിരുന്നു മനോജ്.

ഞായറാഴ്ച ഉച്ചസമയത്താണ് ദാരുണമായ അപകടം നടന്നത്. കള്ളക്കടൽ പ്രതിഭാസം മൂലം കടൽ പ്രക്ഷുബ്ധമായിരുന്ന സമയത്ത് മനോജിന്റെ ബന്ധുക്കളായ മൂന്ന് കുട്ടികൾ കടലിൽ ഇറങ്ങുകയും ശക്തമായ കൂറ്റൻ തിരയിൽപ്പെടുകയുമായിരുന്നു. കുട്ടികളെ രക്ഷിക്കാൻ മനോജ് കടലിലേക്ക് ഇറങ്ങിയെങ്കിലും ശക്തമായ അടിയൊഴുക്കിലും കടൽച്ചുഴിയിലും പെട്ട് അദ്ദേഹത്തെ കാണാതാവുകയായിരുന്നു.

നിലവിളി കേട്ടെത്തിയ മത്സ്യത്തൊഴിലാളികൾ മൂന്ന് കുട്ടികളെയും സുരക്ഷിതമായി രക്ഷിച്ച് കരയ്ക്കെത്തിച്ചു. ഇവരെ കൊല്ലത്തെ ബിഷപ്പ് ബെൻസിഗർ ആശുപത്രിയിൽ പ്രവേശിപ്പിച്ചു.

മനോജിനെ കാണാതായതോടെ ലൈഫ് ഗാർഡ്, കോസ്റ്റൽ പോലീസ്, മത്സ്യത്തൊഴിലാളികൾ എന്നിവർ ചേർന്ന് വിപുലമായ തിരച്ചിൽ നടത്തി. തിരച്ചിലിനൊടുവിൽ വൈകിട്ട് 5.30-ഓടെ ബീച്ചിന് സമീപത്തുനിന്ന് തന്നെ മൃതദേഹം കണ്ടെത്തി.

ബന്ധുക്കളുടെ ജീവൻ രക്ഷിക്കാൻ സ്വന്തം ജന്മദിനത്തിൽ ജീവൻ ബലിയർപ്പിച്ച മനോജിന്റെ മരണം നാട്ടിൽ വലിയ ദുഃഖം സൃഷ്ടിച്ചിട്ടുണ്ട്.