ലിയോൺ: ലോകത്ത് ആദ്യമായി മനുഷ്യനിൽ ഷമോണ്ട (Shamonda) വൈറസ് ബാധ സ്ഥിരീകരിച്ച് ഫ്രാൻസ്. ഗുരുതരമായ രോഗത്തെ തുടർന്ന് ചികിത്സയിലായിരുന്ന, പ്രതിരോധശേഷി തീർത്തും കുറഞ്ഞ രോഗിയിലാണ് വൈറസ് ബാധ കണ്ടെത്തിയത്. രോഗി 2026 ഒക്ടോബർ ആദ്യവാരം മരിച്ചതായി ഫ്രഞ്ച് ആരോഗ്യ അധികൃതർ അറിയിച്ചു. മരിക്കുന്നതിന് മുമ്പ് രോഗിക്ക് ഉണ്ടായ നാഡീവ്യവസ്ഥയുമായി ബന്ധപ്പെട്ട സങ്കീർണതകൾ വൈറസ് ബാധയുമായി ബന്ധപ്പെട്ടിരിക്കാമെന്നാണ് പ്രാഥമിക വിലയിരുത്തൽ. എന്നാൽ മരണത്തിന് വൈറസ് നേരിട്ട് കാരണമായോ എന്ന കാര്യത്തിൽ അന്വേഷണം തുടരുകയാണ്.

ഫ്രാൻസിലെ ലിയോണിലുള്ള ഹോസ്പീസ് സിവിൽസ് ഡി ലിയോണിൽ (Hospices Civils de Lyon) ഗുരുതരമായ അസുഖത്തിന് ചികിത്സയിലായിരുന്ന രോഗിയിലാണ് വൈറസ് സ്ഥിരീകരിച്ചത്. ഇതുവരെ മൃഗങ്ങളിൽ മാത്രം കണ്ടെത്തിയിരുന്ന ഷമോണ്ട വൈറസ് മനുഷ്യനിൽ സ്ഥിരീകരിക്കുന്നത് ഇതാദ്യമായാണെന്ന് അധികൃതർ വ്യക്തമാക്കി.

മൃഗങ്ങളിൽനിന്ന് മനുഷ്യരിലേക്ക്?

കന്നുകാലികളിലാണ് പ്രധാനമായും ഷമോണ്ട വൈറസ് കണ്ടെത്തിയിട്ടുള്ളത്. ആടുകൾ, ചെമ്മരിയാടുകൾ, കുതിരകൾ തുടങ്ങിയ മൃഗങ്ങളിലും വൈറസ് ബാധ റിപ്പോർട്ട് ചെയ്തിട്ടുണ്ട്. കൊതുകുകളല്ല, പ്രധാനമായും Culicoides വിഭാഗത്തിൽപ്പെട്ട ചെറിയ കടിക്കുന്ന മിഡ്ജുകൾ വഴിയാണ് വൈറസ് മൃഗങ്ങൾക്കിടയിൽ പകരുന്നത്.

1960-കളുടെ മധ്യത്തിൽ നൈജീരിയയിലാണ് വൈറസ് ആദ്യമായി കണ്ടെത്തിയത്. തുടർന്ന് ആഫ്രിക്കയുടെ വിവിധ ഭാഗങ്ങളിലും ജപ്പാനിലും മൃഗങ്ങളിൽ വൈറസ് സാന്നിധ്യം റിപ്പോർട്ട് ചെയ്തിരുന്നു. 2026-ലെ വേനൽക്കാലത്താണ് യൂറോപ്പിലെ കന്നുകാലികളിൽ ആദ്യമായി വൈറസ് കണ്ടെത്തിയത്.

കിഴക്കൻ ഫ്രാൻസിൽ ഈ വർഷം വസന്തകാലത്തും വേനൽക്കാലത്തും മൃഗങ്ങളിൽ വൈറസ് സാന്നിധ്യം കണ്ടെത്തിയിരുന്നു. ഇവിടെവെച്ച് രോഗിക്ക് രോഗബാധിതമായ മിഡ്ജിന്റെ കടിയേറ്റതാകാമെന്നാണ് ആരോഗ്യ അധികൃതരുടെ പ്രാഥമിക നിഗമനം. എന്നാൽ രോഗബാധയുടെ കൃത്യമായ ഉറവിടവും ഇതിൽ ഉൾപ്പെട്ട പ്രാണിയുടെ ഇനവും ഇതുവരെ സ്ഥിരീകരിച്ചിട്ടില്ല.

പൊതുജനങ്ങൾക്ക് ഭീഷണിയില്ലെന്ന് അധികൃതർ

മനുഷ്യരിൽ ഇതുവരെ റിപ്പോർട്ട് ചെയ്യപ്പെടാത്ത വൈറസ് ബാധയാണെങ്കിലും നിലവിലെ അറിവിന്റെ അടിസ്ഥാനത്തിൽ പൊതുജനാരോഗ്യത്തിന് ഭീഷണിയുള്ളതായി കണ്ടെത്തിയിട്ടില്ലെന്ന് ഫ്രഞ്ച് ആരോഗ്യ അധികൃതർ വ്യക്തമാക്കി. ഗുരുതരമായി പ്രതിരോധശേഷി കുറഞ്ഞ രോഗിയിൽ മാത്രം കണ്ടെത്തിയ അസാധാരണ സംഭവമായാണ് അധികൃതർ ഇതിനെ വിലയിരുത്തുന്നത്.

യൂറോപ്യൻ രോഗപ്രതിരോധ നിയന്ത്രണ കേന്ദ്രമായ ഇസിഡിസി (ECDC) സംഭവത്തിൽ നിരീക്ഷണം ശക്തമാക്കിയിട്ടുണ്ട്. ഫ്രഞ്ച് അധികൃതരുമായും യൂറോപ്യൻ പങ്കാളികളുമായും ചേർന്ന് വൈറസ് ബാധയുടെ സാഹചര്യങ്ങളും പൊതുജനാരോഗ്യത്തെ ബാധിക്കാനുള്ള സാധ്യതകളും പരിശോധിച്ചുവരികയാണെന്ന് ഇസിഡിസി അറിയിച്ചു.

രോഗിയുടെ മരണത്തിന് വൈറസ് എത്രത്തോളം കാരണമായെന്നതും രോഗബാധ എങ്ങനെ സംഭവിച്ചെന്നതും വ്യക്തമാക്കാൻ ക്ലിനിക്കൽ, ലബോറട്ടറി, പകർച്ചവ്യാധി സംബന്ധമായ പരിശോധനകൾ തുടരുകയാണ്. ലോകാരോഗ്യ സംഘടനയെയും (WHO) സംഭവത്തെക്കുറിച്ച് അറിയിച്ചിട്ടുണ്ട്.

ഒരു മനുഷ്യനിൽ വൈറസ് ബാധ സ്ഥിരീകരിച്ചെന്നതുകൊണ്ട് മാത്രം വ്യാപകമായ രോഗവ്യാപന ഭീഷണിയുണ്ടെന്ന് കരുതാനാവില്ലെന്നാണ് നിലവിലെ വിലയിരുത്തൽ. അന്വേഷണഫലങ്ങൾ പുറത്തുവരുന്നതോടെ വൈറസിന്റെ മനുഷ്യരിലുള്ള സ്വഭാവത്തെക്കുറിച്ച് കൂടുതൽ വ്യക്തത ലഭിക്കുമെന്നാണ് പ്രതീക്ഷിക്കുന്നത്.