പത്തുദിവസത്തെ ഓണാഘോഷങ്ങളുടെ അവസാനഘട്ടത്തിലേക്ക് കടന്ന് കേരളം ഇന്ന് ഉത്രാടം ആഘോഷിക്കുന്നു. നാളെ തിരുവോണം ആഘോഷിക്കുന്നതിനുള്ള അവസാന ഒരുക്കങ്ങളിലാണ് സംസ്ഥാനം.
തിരുവോണത്തിന് മുന്നോടിയായി അവസാനവട്ട ഒരുക്കങ്ങൾ പൂർത്തിയാക്കുന്നതിനും ആവശ്യമായ സാധനങ്ങൾ വാങ്ങുന്നതിനുമുള്ള ദിവസമായാണ് ഉത്രാടത്തെ പരമ്പരാഗതമായി കണക്കാക്കുന്നത്. ഉത്രാടപ്പാച്ചിൽ ആരംഭിച്ചതോടെ സംസ്ഥാനത്തെ വിവിധ വിപണികളും ഷോപ്പിങ് കേന്ദ്രങ്ങളും സജീവമായി. ഓണാഘോഷത്തിനാവശ്യമായ സാധനങ്ങൾ വാങ്ങുന്നതിനായി വൻ തിരക്കാണ് അനുഭവപ്പെടുന്നത്.
വീടുകൾ വർണാഭമായ ഓണപ്പൂക്കളങ്ങളാൽ അലങ്കരിക്കുമ്പോൾ, നാളെ വിളമ്പുന്ന പരമ്പരാഗത ഓണസദ്യയ്ക്കുള്ള ഒരുക്കങ്ങളും പുരോഗമിക്കുകയാണ്.
അതേസമയം, സംസ്ഥാനത്തെ ഔദ്യോഗിക ഓണം–ടൂറിസം വാരാഘോഷങ്ങൾ ഇന്നലെ ആരംഭിച്ചു. തിരുവനന്തപുരം ഉൾപ്പെടെ വിവിധ ജില്ലകളിൽ ഓണാഘോഷങ്ങളുടെ ഭാഗമായി വൈവിധ്യമാർന്ന കലാ-സാംസ്കാരിക പരിപാടികളാണ് സംഘടിപ്പിക്കുന്നത്.
കേരളത്തിലെ വിവിധ ക്ഷേത്രങ്ങളിലും പ്രത്യേക പൂജകൾ നടക്കുന്നുണ്ട്. ശബരിമല ശ്രീധർമശാസ്താ ക്ഷേത്രം ഉൾപ്പെടെയുള്ള പ്രധാന ക്ഷേത്രങ്ങളിൽ പ്രത്യേക പൂജകളും ചടങ്ങുകളും നടക്കുന്നതിനിടെ, തിരുവോണത്തെ വരവേൽക്കാനുള്ള ആവേശത്തിലാണ് കേരളം.
