മുംബൈയെ അടുത്ത 10 വർഷത്തിനകം ചേരിരഹിത നഗരമാക്കി മാറ്റുമെന്ന് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ്. മുംബൈയിലെ റിയൽ എസ്റ്റേറ്റ്, അടിസ്ഥാനസൗകര്യ നിക്ഷേപക ഉച്ചകോടിയിലാണ് പ്രഖ്യാപനം.
ചേരികൾ, പഴക്കംചെന്ന കെട്ടിടങ്ങൾ, പഴയ ഭവനവികസന മേഖലകൾ എന്നിവയെ പ്രത്യേക കൂട്ടങ്ങളായി തിരിച്ച് സമഗ്ര പുനർവികസനം നടത്താനാണ് പദ്ധതി. ഇതിനായി മുംബൈയിൽ 19 പുനർവികസന മേഖലകൾ കണ്ടെത്തിയിട്ടുണ്ട്. ചേരി പുനരധിവാസ അതോറിറ്റി, മഹാരാഷ്ട്ര ഭവന വികസന അതോറിറ്റി, മുംബൈ മെട്രോപൊളിറ്റൻ മേഖല വികസന അതോറിറ്റി തുടങ്ങിയ സ്ഥാപനങ്ങളുടെ ഏകോപനത്തോടെയാകും പദ്ധതി നടപ്പാക്കുക.
ധാരാവി പുനർവികസന പദ്ധതിക്കാണ് പ്രത്യേക പ്രാധാന്യം. ആദ്യഘട്ടത്തിൽ ഏകദേശം 10,000 പുനരധിവാസ വീടുകൾ 2029ന്റെ തുടക്കത്തോടെ പൂർത്തിയാക്കുകയാണ് ലക്ഷ്യം. അർഹരായ താമസക്കാർക്ക് അതേ പ്രദേശത്ത് ഏകദേശം 350 ചതുരശ്ര അടി വിസ്തീർണമുള്ള വീടുകൾ നൽകും.
മെച്ചപ്പെട്ട ഭവനസൗകര്യങ്ങൾക്കൊപ്പം ശുചിമുറി, അടുക്കള, പ്രകൃതിദത്ത വെളിച്ചം, സ്ത്രീകൾക്കുള്ള പ്രത്യേക സൗകര്യങ്ങൾ എന്നിവയും ഒരുക്കും. പ്രാദേശിക ചെറുകിട വ്യവസായങ്ങൾ സംരക്ഷിക്കുന്നതിനും ഗതാഗത സൗകര്യങ്ങൾ മെച്ചപ്പെടുത്തുന്നതിനും പദ്ധതിയിൽ പ്രാധാന്യം നൽകും.
‘മുംബൈ 3.0’ എന്ന വിശാല നഗരവികസന പദ്ധതിയുടെ ഭാഗമായാണ് ചേരിരഹിത മുംബൈ എന്ന ലക്ഷ്യം സർക്കാർ മുന്നോട്ടുവയ്ക്കുന്നത്. എന്നാൽ താമസക്കാരുടെ അർഹത നിർണയം, ഉപജീവനമാർഗങ്ങളുടെ സംരക്ഷണം, പുനരധിവാസം, വിവിധ സർക്കാർ സ്ഥാപനങ്ങളുടെ ഏകോപനം എന്നിവ പ്രധാന വെല്ലുവിളികളായിരിക്കും.
