പാലക്കാട്: പന്തലാംപാടം നീലിപ്പാറയിലെ പ്രദേശവാസികളുടെ ദീർഘകാല ആവശ്യമായ അടിപ്പാതയുടെ നിർമാണ പ്രവർത്തനങ്ങൾക്ക് തുടക്കമായി. വിദ്യാർഥികൾക്കും പ്രദേശവാസികൾക്കും ദേശീയപാത സുരക്ഷിതമായി മുറിച്ചുകടക്കുന്നതിനുള്ള സൗകര്യമൊരുക്കുകയാണ് പദ്ധതിയുടെ ലക്ഷ്യം. ആലത്തൂർ എംപി കെ. രാധാകൃഷ്ണനാണ് ഇക്കാര്യം അറിയിച്ചത്.
മേരി മാതാ ഹയർ സെക്കൻഡറി സ്കൂളിന് സമീപമുണ്ടായിരുന്ന ആകാശനടപ്പാത നീക്കം ചെയ്തതിനെത്തുടർന്ന് വിദ്യാർഥികളും പ്രദേശവാസികളും ദേശീയപാത മുറിച്ചുകടക്കുന്നതിൽ സുരക്ഷാ പ്രശ്നങ്ങൾ നേരിട്ടിരുന്നു. ഇതിന് പരിഹാരം ആവശ്യപ്പെട്ട് പന്തലാംപാടം സംയുക്ത സമരസമിതി നിവേദനം സമർപ്പിച്ചതോടെയാണ് വിഷയത്തിൽ ഇടപെടൽ ആരംഭിച്ചത്. നിലവിലെ മേൽപ്പാല നിർമാണവുമായി ബന്ധപ്പെട്ട ഗതാഗത സാഹചര്യങ്ങളും പരിഗണിച്ചാണ് അടിപ്പാതയെന്ന നിർദേശവുമായി ബന്ധപ്പെട്ട നടപടികൾ മുന്നോട്ടുപോയത്.
തുടർന്ന് പി.പി. സുമോദ് എംഎൽഎയും മറ്റ് ജനപ്രതിനിധികളും ജില്ലാ കളക്ടറും ബന്ധപ്പെട്ട ഉദ്യോഗസ്ഥരും ചേർന്ന് നീലിപ്പാറ സന്ദർശിച്ച് സ്ഥിതിഗതികൾ വിലയിരുത്തി. അടിപ്പാത നിർമിക്കുന്നതിനുള്ള സാധ്യത പരിശോധിക്കാൻ വിവിധ വകുപ്പുകളിലെ ഉദ്യോഗസ്ഥരും ജനപ്രതിനിധികളും ഉൾപ്പെട്ട വിദഗ്ധ സമിതിയെ നിയോഗിച്ചു. സമിതി നടത്തിയ സ്ഥലപരിശോധനയ്ക്കും സാധ്യതാ പഠനത്തിനും ശേഷമാണ് അടിപ്പാത നിർമാണത്തിന് അനുയോജ്യമായ സ്ഥലം കണ്ടെത്തിയത്.
മേരി മാതാ ഹയർ സെക്കൻഡറി സ്കൂൾ ഓഡിറ്റോറിയത്തിന് സമീപം ഏഴ് മീറ്റർ വീതിയിൽ ആവശ്യമായ അടിസ്ഥാന സൗകര്യങ്ങളോടെയുള്ള അടിപ്പാത നിർമിക്കാനാണ് തീരുമാനമായത്. നിർദിഷ്ട സ്ഥലവുമായി ബന്ധപ്പെട്ട് ദേശീയപാത അതോറിറ്റി ഓഫ് ഇന്ത്യയുമായി (എൻ.എച്ച്.എ.ഐ.) ആവശ്യമായ നടപടികൾ പൂർത്തിയാക്കിയതോടെയാണ് നിർമാണ പ്രവർത്തനങ്ങൾ ആരംഭിച്ചത്.
വിഷയത്തിന്റെ വിവിധ ഘട്ടങ്ങളിൽ ബന്ധപ്പെട്ട അധികാരികളുമായി ചർച്ചകളും പരിശോധനകളും ഏകോപനവും നടത്തിയ ശേഷമാണ് പദ്ധതിയുമായി മുന്നോട്ടുപോകാൻ കഴിഞ്ഞതെന്ന് കെ. രാധാകൃഷ്ണൻ എംപി വ്യക്തമാക്കി.
അടിപ്പാത യാഥാർഥ്യമാകുന്നതോടെ നീലിപ്പാറയിലെ വിദ്യാർഥികൾക്കും പ്രദേശവാസികൾക്കും ദേശീയപാത മുറിച്ചുകടക്കാൻ കൂടുതൽ സുരക്ഷിതമായ സൗകര്യം ലഭിക്കും. ഏറെക്കാലമായി പ്രദേശവാസികൾ ഉന്നയിച്ചിരുന്ന ഗതാഗതസുരക്ഷാ പ്രശ്നത്തിന് ഇതോടെ പരിഹാരമാകുമെന്നാണ് പ്രതീക്ഷ.
