തിരുവനന്തപുരം: ദക്ഷിണ കിഴക്കൻ സെൻട്രൽ റെയിൽവേയുടെ ബിലാസ്പൂർ ഡിവിഷനിൽ നാലാം പാത കമ്മീഷൻ ചെയ്യുന്നതിനോടനുബന്ധിച്ചുള്ള ട്രാഫിക് നിയന്ത്രണങ്ങൾ കാരണം നേരത്തെ റദ്ദാക്കിയിരുന്ന തിരുവനന്തപുരം നോർത്ത്–കോർബ–തിരുവനന്തപുരം നോർത്ത് ദ്വൈവാര സൂപ്പർഫാസ്റ്റ് എക്സ്പ്രസ് സർവീസുകൾ പുനഃസ്ഥാപിച്ചതായി റെയിൽവേ അറിയിച്ചു.

ഇതോടെ ട്രെയിൻ നമ്പർ 22648 തിരുവനന്തപുരം നോർത്ത്–കോർബ ദ്വൈവാര സൂപ്പർഫാസ്റ്റ് എക്സ്പ്രസ് 2026 ജൂൺ 11-നും 15-നും നിശ്ചിത സമയക്രമപ്രകാരം തിരുവനന്തപുരം നോർത്തിൽ നിന്ന് സർവീസ് നടത്തും.

അതുപോലെ, ട്രെയിൻ നമ്പർ 22647 കോർബ–തിരുവനന്തപുരം നോർത്ത് ദ്വൈവാര സൂപ്പർഫാസ്റ്റ് എക്സ്പ്രസ് ജൂൺ 13-നും 17-നും കോർബയിൽ നിന്ന് പതിവ് സമയക്രമത്തിൽ സർവീസ് നടത്തുമെന്നും അധികൃതർ അറിയിച്ചു.

ബിലാസ്പൂർ ഡിവിഷനിലെ നാലാം പാതയുടെ കമ്മീഷനിംഗ് പ്രവർത്തനങ്ങളുമായി ബന്ധപ്പെട്ട് പ്രഖ്യാപിച്ചിരുന്ന സർവീസ് റദ്ദാക്കൽ ഉത്തരവ് പിൻവലിച്ചതോടെയാണ് ട്രെയിനുകൾ വീണ്ടും സർവീസിലേക്ക് മടങ്ങിയെത്തുന്നത്. നേരത്തെ യാത്ര മാറ്റിവെക്കുകയോ ബദൽ മാർഗങ്ങൾ തേടുകയോ ചെയ്തിരുന്ന യാത്രക്കാർക്ക് ഈ തീരുമാനം വലിയ ആശ്വാസമാകുമെന്നാണ് വിലയിരുത്തൽ.