കൊല്ലം: 11 മാസമായി ഇറാനിൽ കുടുങ്ങിക്കിടക്കുന്ന മലയാളി യുവാവ് അക്ഷയ് ഹരീഷിന്റെ നാട്ടിലേക്കുള്ള മടക്കയാത്രയ്ക്ക് വഴിയൊരുങ്ങുന്നു. അക്ഷയുടെ കുടുംബവുമായി നേരിട്ട് സംസാരിച്ച കേന്ദ്രമന്ത്രി സുരേഷ് ഗോപി, നാട്ടിലേക്ക് മടങ്ങുന്നതിനാവശ്യമായ അടിയന്തര യാത്രാരേഖകൾ അന്നുതന്നെ ലഭ്യമാക്കുമെന്ന് ഉറപ്പുനൽകി. ഡി.ഡി. ന്യൂസ് മലയാളമാണ് ഇക്കാര്യം റിപ്പോർട്ട് ചെയ്തത്.
കൊല്ലം സ്വദേശിയായ അക്ഷയ് ഹരീഷ് കപ്പലിൽ വാച്ച്കീപ്പറായി ജോലി ചെയ്യുന്നതിനിടെയാണ് ഇറാനിൽ കുടുങ്ങിയത്. ജോലി ആവശ്യത്തിനിടെ പാസ്‌പോർട്ട് നഷ്ടപ്പെട്ടതോടെയാണ് പ്രതിസന്ധി ആരംഭിച്ചത്. റിക്രൂട്ടിങ് ഏജന്റ് ദുബായിൽ ജോലി വാഗ്ദാനം ചെയ്താണ് അക്ഷയെ വിദേശത്തേക്ക് കൊണ്ടുപോയത്. എന്നാൽ പിന്നീട് ഇറാനും പാകിസ്ഥാനും ഉൾപ്പെടുന്ന യാത്രകളുള്ള കപ്പലുകളിലാണ് ജോലി ചെയ്യേണ്ടിവന്നത്.
പാസ്‌പോർട്ട് നഷ്ടമായതോടെ തിരിച്ചുവരാൻ കഴിയാതെ 11 മാസമായി അക്ഷയ് ഇറാനിൽ തുടരുകയായിരുന്നു. മകനെ നാട്ടിലെത്തിക്കാനുള്ള കുടുംബത്തിന്റെ ശ്രമങ്ങളും ഇതോടെ നീണ്ടുപോയി.
നേരത്തെ കേരള തൊഴിൽമന്ത്രി ബിന്ദു കൃഷ്ണ വിഷയത്തിൽ ഇടപെട്ടിരുന്നു. ഇന്ത്യൻ എംബസിയുമായും നോർക്ക റൂട്ട്സുമായും ബന്ധപ്പെട്ട് അക്ഷയെ നാട്ടിലെത്തിക്കാനുള്ള നടപടികൾക്ക് മന്ത്രി നേതൃത്വം നൽകി.
ഇതിനിടെയാണ് കേന്ദ്രമന്ത്രി സുരേഷ് ഗോപി അക്ഷയുടെ കുടുംബവുമായി നേരിട്ട് സംസാരിച്ച് ഇടപെടൽ നടത്തിയത്. അടിയന്തര യാത്രാരേഖകൾ അതേദിവസം തന്നെ ലഭ്യമാക്കുമെന്ന് അദ്ദേഹം കുടുംബത്തിന് ഉറപ്പുനൽകിയതായാണ് റിപ്പോർട്ട്.
സുരേഷ് ഗോപിയുടെ ഇടപെടലോടെ നടപടികൾ വേഗത്തിലായതായും അക്ഷയ് ഹരീഷിന്റെ നാട്ടിലേക്കുള്ള മടക്കയാത്ര ഉടൻ സാധ്യമാകുമെന്ന പ്രതീക്ഷയിലുമാണ് കുടുംബം.
